Сумын Засаг даргын 2022 оны 09 дүгээр сарын 29-ний өдрийн “Малын үзэсгэлэн худалдаа зохион байгуулах, хээлтүүлэгч мал тараах тухай” 144 дүгээр захирамжийн дагуу хийх ажлын Удирдамж гарган Засаг даргаар батлуулж холбогдох хүмүүст хүргэн хэрэгжилтийг ханган ажилласан. Хээлтүүлэгч малын үзэсгэлэн худалдааг 10 дугаар сарын 09-нд зохион байгуулж шалгарууллаа. Нас гүйцсэн хуцны төрөлд малчин Д.Базарготов, Д.Эрдэнээ, М.Галбадрал нарын хуц хаврын амьдын жингээ 14.5-29.3 хувиар, өсвөр хуцны төрөлд малчин Х.Батцэнгэл, М.Галбадрал, Д.Батбаяр нарын хуц хаврын амьдын жингээ 44.5-51.5 хувиар, нас гүйцсэн ухнаны төрөлд малчин О.Одгэрэл, Д.Мягмардорж, П.Тогтохбуян нарын ухна хаврын амьдын жингээ 21.4-42 хувиар, өсвөр ухнаны төрөлд П.Түмэнбаяр, Д.Мөнхтулга нарын ухна хаврын амьдын жингээ 30-46.9 хувиар тус тус нэмэгдүүлсэн үзүүлэлтээр шалгарлаа. Шалгарсан хээлтүүлэгч малыг Тэргүүн, Дэд, Тусгай байрт шалгаруулж алт, мөнгө, хүрэл медаль олголоо.

Шалгарсан малын эздэд Гэрчилгээ, хариуцсан малдаа дээд зэргийн тарга хүч авахуулсан Давааны ам багийн малчин Д.Энхтүвшинд Талархал хадгалуулж урамшуулав. Шалгарсан хээлтүүлэгчийг Монгол үүлдрийн стандарттай харьцуулж үзэхэд бүдүүн хуцны амьдын жин 20-27 кг-аар, төлгөн хуц 10.5-19 кг-аар, нас гүйцсэн ухна 9.5-12 кг-аар, борлон ухна 5-6.5 кг-аар илүү үзүүлэлттэй байлаа.